3月股災

呢一篇講一講我 3月股災既經過

自從由2019年係IB開始進行買賣之後, 主要既原因, 係希望建立收息組合, 以長期的現金流去增加回報, 而當中組合涉及多種投資物, 當中包括有債劵, ETD, 優先股, bond CEF, Reits, 港股, 以及一些期權,希望額外增加現金流收入.

希望建立一個穩定, 低波幅, 及高債息/股息的組合去令組合不斷可以 re-investment, 籍此建立一個長遠的被動收入組合.

而用得IB, 當然目的就係透過槓桿操作原理去放大收益, 而我一直做緊既leverage 係2以下, 本身覺得都安全的. 但直至美股開始大瀉

當美股大瀉, 自己還未意識到本身自己持股的問題所在, 一直以為分散投資, 因為我大概所有公司, 基本上有30間, 每間只佔總體的3%左右, 以為已經好穩陣, 亦同時分散去不同國家/地方既投資物之餘, 再分散不同種類 (包括債劵/優先股等各不同類型), 總覺得唔會有問題,

總實際損失方面, 大概下跌了35%左右

經過一輪既思考及檢討, 當中發現自己的問題在於以下幾點

1) 匯率及槓桿問題
第一個問題, 一直以來做槓桿既操作, 都係借低息貨幣, 買入高息資產, 以我自己為例, 我係借日元買美債為主, 本身無考慮到日元升值所受的影響, 假設我買入HK$50萬收息資產, 亦同時借入約HK$50萬的日元貨幣再買入, 即總共有100萬貨, 而我借日元, 係主力買美元產品, 所以一直有留意住 USD.JPY的匯價, 2020年3月以前, 一般維持住110至111左右, 但原來日元升幅可以好快好急, 短短時間, 日元由110升至101, 即中間有8%差異, 變成負債由50萬, 變成54萬負債, 而本身既資產, 亦由原來100萬亦下跌了15%, 變成85萬

原來 100萬資產 , (50萬負債) , NAV = 50萬, leverage 為2
變成 85萬資產,  (54萬負債), NAV = 31萬, leverage 2.74

而因應我本身係IB只屬於margin account, 故此不可能leverage 變成2.74, 所以我只能被逼賣貨來降低槓桿, 所以不斷賣貨後, 來減槓桿, 這個教訓明白了匯率的風險性, 即長倉買美元, 短倉買日元, 貨幣唔一致的情況下, 可以長倉跌, 短倉負債升, 會輸得好快, 所以明白到即使再做槓桿, 也不會考慮換其他貨幣, 只會借入相同貨幣, 貨幣升, 資產負債升, 貨幣跌, 資產負債一齊跌, 同步先會安全. 同埋大市瘋狂跌既時候,  避險情緒, 資金瘋狂入日元同美國國債, 導致日元升得好快, 資產跌得好快, 所以考慮到, 或者盡量之後唔做槓桿, 或者做一d 偽槓桿, 即係其他地方借錢, 再係IB進行投資.

2)  全球化問題
第二個問題, 本身係盡量做到整個倉位多元化, 不同種類的收息投資物, 大概有30隻, 買入美國, 香港, 新加坡等不同地域, 但原來美國有事, 全世界都自然冧, 根本其實無得避險, 唯一避險, 就係現金, 或買入黃金, 但本身入得錢去IB, 自然係想買野, 所以本身根本無考慮係IB都要擺番唔少現金溝貨. 當然, 我也不是訓身買貨, 只不過相對於自己原本打算買入多源化投資物, 但當下跌時, 其實結果只是一樣.

3) 債劵
第三個問題, 當一直以為債劵已經係安全既投資產品, 但其實債券也不會十分穩陣. 當出現經濟危機, 違約, 破產既公司只會不斷增加. 而且債價可以跌得好嚴重, 而非investment grade 既債, 真係跌到一地玻璃碎. 但為左救倉都要賣債填槓桿

4) 期權
第四個問題, 當同時做幾張較長時間的Short Put, 大跌時, 自然直接影響倉位既問題, 以後做SP, 會盡量開短時間

綜上所述, 當下跌時, 已經盡量採取救倉動作, 但仍避免不了, 總倉下跌了35%
不過, 我又無特別灰心或失望, 今次既跌, 係可以令自己更加思考, 如何做好真正既投資, 而我亦慶幸, 而家跌幾廿萬, 總好過係IB投資左10幾年, 突然唔見幾百萬, 到時仲大獲

而我發現經濟危機下, 以往買股通常會買大公司, 而家反現發現未必好, 因為大企業, 大部分都負債多, 危機下更容易暴露左自己既弱點.

而一直好多人喜好既reits, / 地產股,  現階後我暫時唔會唸, 因為正如 starman曾在書上所言, 現金流如血, 沒有現金流會令巨人倒下, 資金鏈一斷, 企業自然出問題. 而現時全球受疫情影響, 所有零售商場 reits, 或一些地產股, 租金一斷, 已經陸續引起好多問題, 而房地產牽引著銀行, 房地產倒閉, 銀行地壞帳增加, 影響甚大. 而現時已經有一些美國房地產公司相繼倒閉

另外, 我發現自己IB 組合, 雖然只係開始左半年, 但情況好的時侯, 也未必跑羸S&P, 跌市時, 也下跌多於S&P.  我係度諗番, 如果自己跑不羸, 倒不如買入S&P既ETF, 如VOO, SPY仲好, 同埋幫你自動選取最強既企業組合

因為S&P, 市跌時, 可以幫你防守, 避免單一企業損失, 市升時, S&P亦帶給你回報, 而且根本唔駛考慮公司經營如何, 而且買入單一公司, 要睇公司努力經營, 但買S&P ETF, 只要經濟好, 個市多錢, 就自然一定受惠

但當然買S&P, 本身非我性格, 因為不能產生cash flow, S&P息率太少, 不能reinvestment, 但現階段, 我暫時策略係分階段儲S&P, 如買入SPY或VOO, 同時以透過期權策略, 增加現金流, 再重覆買入S&P. 因為睇番歷史, 每次股災, 可以死好多公司, 但唔會死美國, 所以買S&P, 總會反彈, 而係2008年海嘯後, 我睇番S&P, 由600幾點升至上年高位3300點, 累積升幅高達5倍.當然未必有人會捕捉得咁靚仔.  但長遠見, 美國死後總會翻生. 因為始終美元本身就係霸權

生活記事

自從係2019年10月更新後, 一直再沒有更新, 主因是工作太忙碌, 因自從2019年7月升左一次職位後, 突然發覺, 自己已經不能夠過正常的生活, 因為工作量十分驚人, 每日一訓醒就返工, 放工已是深夜.

生活除左工作, 當然都有開心同唔開心, 哥哥都係2019年上左幼稚園, 亦帶左妹妹去左第一次台灣旅行 (而家因為疫情, 都唔知何年何月再可以去), 而亦因為工作, 同時忽略左小朋友及家人, 女兒都入左一次醫院, 哥哥都 2019年尾連續高燒幾天


係呢段期間, 生活上經歷了好多事情, 關於不同的層面都有, 之後有時間, 或會慢慢記錄番下來.

而我自己一直都明白, 以勞動力來換取金錢, 是一個不智的想法, 因為靠勞動力來獲得收入, 是十分不穩定, 如果身體突然有事, 就自然手停口停. 但有時人生不是由自己話事, 自己本是編劇, 但有時自己唔係導演, 人在江湖, 身不由己, 唔到自己話事.

呢段時間深深明白到, 人一生最寶貴既財富就係時間, 身體健康目的就係希望可以有更加多既時間.

但不停工作, 苦了自己, 苦了家人, 所以今日打呢篇文章, 就係希望提醒自己, 時間先係最寶貴, 而我因為早前申請了降職, 今日2020年4月1日, 職位到期卸任了, 由另一位同事頂上, 終於可以過番一些自己希望擁有的生活

之後我就可以係工餘既時間, 做番一d 我希望做既野.  另外, 我都估唔到, 原來我個 blog記錄既野, 係有人睇的, 稍後希望會勤力d update, 而同時會按番幾個不同的層面去記錄, 當中包括有
1) 金融投資
2) 創業想法
3) 健康及醫學討論
4) 教育

而 2020年, 因疫情影響全球經濟, 我既 ib 倉, 由 2019年開始, 中間經歷了好多投資既唸法及過程, 以及3月股災斬倉既經歷, 下一篇會寫番出來, 等自己都同時可以引以為鑑